Stjórnvöld hafa tekið ákvörðun um að ráða fjóra sérfræðinga í sérstaka framkvæmdastjórn um losun fjármagnshafta. Samkvæmt heimildum Morgunblaðsins verður framkvæmdastjórnin skipuð þeim Benedikt Gíslasyni, ráðgjafa og aðstoðarmanni efnahags- og fjármálaráðherra, Freyr Hermannssyni, forstöðumanni fjárstýringar Seðlabanka Íslands, Eiríki Svavarssyni, hæstaréttarlögmanni, og Glenn Victor Kim, fjármálaráðgjafa hjá LJ Capital en hann starfaði áður meðal annars hjá bandaríska fjárfestingabankanum Lehman Brothers í meira en tuttugu ár.
Líklegt þykir að fleiri sérfræðingar verði fengnir til að starfa í framkvæmdastjórninni síðar á árinu.
Hafa stjórnvöld ennfremur gert samkomulag við ráðgjafafyrirtækið White Oak, bandaríska lögmanninn Lee Buchheit, sem stýrði samninganefnd Íslands í viðræðum við bresk og hollensk stjórnvöld í Icesave-deilunni, Anne Krueger, hagfræðiprófessor og fyrrverandi aðstoðarframkvæmdastjóra Alþjóðagjaldeyrissjóðsins, og fjárfestingabankann JP Morgan.
Áætlað er að stjórnvöld tilkynni opinberlega um ráðningu framkvæmdastjórnarinnar og erlendu ráðgjafanna í vikunni.
Framkvæmdastjórnin mun starfa undir stýrinefnd sem hefur yfirumsjón með áætlun um losun hafta og Bjarni Benediktsson fjármálaráðherra leiðir. Aðrir fulltrúar í stýrinefndinni eru seðlabankastjóri, ráðneytisstjórar forsætis- og fjármálaráðuneytis og Benedikt Árnason, efnahagsráðgjafi forsætisráðherra.
Eiríkur, sem var einn af forsvarsmönnum InDefence-hópsins sem barðist gegn samþykkt Icesave-samninganna, var jafnframt í sex manna ráðgjafahópi sem ríkisstjórnin skipaði í lok nóvember 2013 til að leggja mat á stöðu stöðu þjóðarbúsins og koma með tillögur að leiðum við afnám hafta. Benedikt starfaði einnig náið með hópnum.
Starfsmenn framkvæmdastjórnarinnar munu vinna í fullu starfi að áætlun um afnám hafta og í þeim efnum verða meðal annars tillögur ráðgjafahópsins, sem voru kynntar stjórnvöldum í apríl sl., hafðar að leiðarljósi.