Skuldastaðan ríkisins er enn mjög erfið. Skuldir standa nokkurn veginn í stað á nafnvirði en að raunvirði fara þær hins vegar lækkandi. Þetta kemur fram í Hagsjá hagfræðideildar Landsbankans.
„Hlutfall heildarskulda ríkisins af vergri landsframleiðslu fór yfir 117% á árinu 2011, en lækkaði niður í 115% á árinu 2012 og í 108% á árinu 2013. Þetta er þróun í rétta átt en engu að síður eru skuldirnar mjög háar í sögulegu samhengi og einnig í samanburði við þær þjóðir sem við viljum bera okkur saman við. Vaxtakostnaður ríkisins er mikil byrði og var nálægt 75 ma. kr. 2013. Til samanburðar má benda á að rekstur Landspítalans á því ári kostaði rúma 40 ma. kr. Vaxtakostnaður ársins 2013 var því um 80% hærri en rekstrarkostnaður spítalans,“ segir ennfremur.
Þá segir að meginniðurstaðan varðandi ríkisreikninginn fyrir 2013 sem birtur var fyrir helgi sé að þróunin sé á réttri leið en árangurinn verði hins vegar að vera mun betri til þess að sett markmið náist.
Hagsjá hagfræðideildar Landsbankans