Erlendir ferðamenn eyddu að raunvirði 11% meira í verslun í fyrra en árið áður. Umsvifin námu 16 milljörðum króna ef horft er til greiðslukortaveltu.
Þeir keyptu mest í fataverslunum, einkum útivistarfatnað, og dagvöruverslunum, að því er fram kemur í Morgunblaðinu í dag. Til samanburðar jókst velta almennt í smásöluverslun 1,4% umfram verðbólgu og nam 359 milljörðum króna án virðisaukaskatts árið 2013.
Greiðslukortavelta erlendra ferðamanna hér á landi jókst hins vegar um 17% á sama tíma og þeim fjölgaði um 20% á milli ára sem sóttu landið heim. Þetta kemur fram í nýútkominni Árbók verslunarinnar sem fjallar um hagtölur um íslenska verslun og er tekin saman af Rannsóknarsetri verslunarinnar.