Gunnar Hólmsteinn Guðmundsson, rekstrarstjóri hjá íslenska leikjaframleiðandanum Plain Vanilla og einn af stofnendum hugbúnaðarfyrirtækisins CLARA, er í tólfta sæti á lista blaðsins Nordic Business Report yfir þrjátíu efnilegustu forstjórana í Norður-Evrópu sem eru undir þrjátíu ára aldri.
Gunnar Hólmsteinn er 28 ára og stofnaði CLARA árið 2008, en bandaríski hugbúnaðarrisinn Jive Software keypti fyrirtækið síðasta vor. Hann gekk til liðs við Plain Vanilla í marsmánuði á þessu ári, þar sem hann starfar við hlið forstjórans, Þorsteins Baldurs Friðrikssonar.
Annar íslenskur frumkvöðull, Davíð Örn Símonarson, framkvæmdastjóri hugbúnaðarfyrirtækisins Blendin, kemst einnig á lista blaðsins en hann situr þar í 28. sæti.
Að valinu kom dómnefnd sem samanstóð af ýmsum samtökum og fyrirtækjum í löndunum níu sem um ræðir, þ.e. Finnlandi, Danmörku, Noregi, Svíþjóð, Íslandi, Rússlandi, Eistlandi, Lettlandi og Litháen.
Paul Durov, stofnandi rússneska samfélagsmiðilsins VKontakte, trónir á toppi listans og þá situr rússneski frumkvöðullinn Vsevolod Strakh, stofnandi netverslunarinnar Sotmarket, í öðru sæti.
Frekari upplýsingar um valið má finna á vef Nordic Business Report.