Samkomulag um tryggingasamninga

Seðlabanki Íslands hefur gert samkomulag varðandi samninga sem Allianz á Íslandi hefur boðið viðskiptavinum sínum hér á landi. Samkomulagið gerir erlenda tryggingafélaginu og viðskiptavinum þess hér á landi kleift að viðhalda óbreyttu samningssambandi og kemur þannig í veg fyrir mögulegt tjón neytenda samhliða því að draga úr neikvæðum áhrifum samninganna á greiðslujöfnuð Íslands.

Með því er stuðlað að frekari stöðugleika í greiðslujafnaðar- og gengismálum hér á landi, í samræmi við markmið laga um gjaldeyrismál og reglna settra á grundvelli þeirra, að því er segir í tilkynningu frá SÍ.

Stórt skref stigið til að eyða óvissu

„Þá er markmiðið enn fremur að stuðla að jafnræði meðal aðila á sama markaði en reiknað er með að sá rammi, sem liggur til grundvallar samkomulaginu, verði hafður til hliðsjónar varðandi möguleika á hliðstæðu fyrirkomulagi fyrir innlenda aðila sem vilja bjóða sambærilegar afurðir. Þó er ljóst að tekið gæti einhvern tíma að vinda að fullu ofan af því ójafnræði sem skapast hafði.

Til að draga úr neikvæðum áhrifum á greiðslujöfnuð Íslands felst í samkomulaginu að tryggingafyrirtæki komi með til landsins erlendan gjaldeyri til mótvægis við yfir helming framtíðariðgjaldagreiðslna sem fara úr landi á grundvelli núgildandi samninga yfir gildistíma samkomulagsins. Geri tryggingafélag nýja samninga kemur það með til landsins erlendan gjaldeyri til mótvægis við framtíðariðgjaldagreiðslur sem fara úr landi á grundvelli þeirra samninga yfir gildistíma samkomulagsins.

Seðlabankinn væntir þess að með samkomulaginu í dag verði stigið stórt skref til að eyða þeirri óvissu sem fjöldi neytenda hefur búið við síðustu mánuði, jafnframt því sem stuðlað er að jákvæðum áhrifum á greiðslujöfnuð landsmanna og þar með auknum stöðugleika í efnahagslífi í landinu,“ segir í tilkynningu.

• 1 blogg um fréttina

Bloggað um fréttina

• Eyjólfur Jónsson: Allir Íslendingar ættu nú að geta sent sín uppsöfnuðu auðæfi …