Breski bankinn HSBC þarf að greiða 550 milljón Bandaríkjadali, eða tæpa 66 milljarða, í bætur vegna húsnæðislána-skuldabéfavafninga sem bankinn seldi fasteignalánafyrirtækjum á árunum fyrir fjármálakeppuna.
Bandaríska húsnæðismálastofnunin eða Federal Housing Finance Authority (FHFA) höfðaði málið en FHFA hóf árið 2011 málarekstur gegn átján bönkum og fjármálastofnunum vegna sölu á ótryggum skuldavafningum til húsnæðislánastofnananna Fannie Mae og Freddie Mac.
Fyrirtækin voru stofnuð af bandarískum stjórnvöldum en skráð á hlutabréfamarkað. Bæði fyrirtækin þurftu á björgun að halda árið 2008 þegar bandaríski fasteignamarkaðurinn hrundi og reiddu stjórnvöld fram samtals 187,5 milljarða dala í þeim tilgangi.
HSBC er sextándi bankinn sem kemst að sambærilegu samkomulagi við FHFA og alls hafa nú um 17,9 milljarðar breskra punda verið greiddar í sektir.
Meðal annarra banka sem hafa þurft að reiða fram bæturnar eru Societe Generale sem samþykkti greiðslu að upphæð 122 milljónir dala. Þá samþykkti Morgan Stanley bankinn í febrúar að greiða 1,25 milljarða dala og í desember náði Deutsche Bank samkomulagi við FHFA um bætur að upphæð 1,9 milljarðar dala.
Þrátt fyrir að hafa fallist á að greiða stjórnvöldum bæturnar er tekið fram í samkomulagi HSBC og FHFA að bankinn gangist ekki við neinum lögbrotum.