Rússneski milljarðamæringurinn Vladimir Yevtushenkov var handtekinn í gær vegna gruns um peningaþvætti og hafa hlutabréf í félagi hans, Sistema, hríðfallið í kjölfarið.
Kauphöllin í Moskvu stöðvaði tímabundið viðskipti með bréf félagsins í dag eftir að þau féllu um 37 prósent í verði. Stjórnarformaður félagsins hefur efast um réttmæti handtökunnar en talsmaður Vladimír Pútíns Rússlandsforseta neitar pólitískum tengslum við málið. Samkvæmt tímaritinu Forbes er auður Yevtushenkov metinn á um 4,4 milljarða Bandaríkjadala.
Sistema félagið á meðal annars stærsta símfyrirtæki Rússlands, MTS, og olíufyrirtækið Bashneft en hlutabréf í síðarnefndu félagi féllu um 20 prósent í morgun og hafa viðskipti með þau einnig verið stöðvuð.
Að sögn saksóknara er Yevtushenkov sakaður um peningaþvætti og saknæma háttsemi við yfirtökur sex olíufélaga í sjálfsstjórnarhéraðinu Bashkíríu á árinu 2009. Ef hann verður fundinn sekur gæti hann átt von á tíu ára fangelsi. Sistema hefur þá gefið frá sér yfirlýsingu sem segir yfirtökurnar hafa verið fullkomlega lögmætar.