Kaffihús Vesturbæjar opnar væntanlega um helgina

Kaffiþyrstir Vesturbæingar hafa beðið um drykklanga stund eftir að kaffihúsið við Melhaga tæki til starfa. Eftirvæntingin er slík að Tumblr-síða hefur verið sett upp til að fylgjast með opnuninni. Pétur Marteinsson, einn þeirra sem standa að Kaffihúsi Vesturbæjar, segir að nú sjái fyrir endann á biðinni.

Þessa dagana fara fram úttektir ýmissa opinberra aðila á húsnæðinu, en að því búnu ætti að vera hægt að opna kaffihúsið. „Ætli við opnum ekki bara um helgina,“ segir Pétur. „Við stefnum á það, nema eitthvað komi upp á.“

Á Tumblr-síðunni erkaffihusvesturbaejarbuidadopna.tumblr.com/ má með tiltölulega einföldum hætti sjá hvort búið sé að opna kaffihúsið. 

Gísli Marteinn Baldursson, annar aðstandandi Kaffihúss Vesturbæjar, sagði í viðtali við Sunnudagsblað Morgunblaðsins að Kaffihúsið verði „lítið hverfiskaffihús.“

„Við erum allir Vesturbæingar sem stöndum að kaffihúsinu. Okkur hefur lengi fundist vanta kaffihús í Vesturbæinn og ákváðum að gera þetta bara sjálfir,“ sagði Gísli og bætti því við að þeir félagarnir líti á Kaffihús Vesturbæja, sem samfélagsverkefni. „Það er tími til kominn að færa þjónustuna aftur inn í hverfin.“

Húsið við Melhagann hefur tekið miklum breytingum frá því þessi mynd var tekin í mars. Kaffihúsið opnar væntanlega um helgina. mbl.is/Kristinn Ingvarsson

• Blogga um frétt