Rúmum 188 milljónum króna var lýst í eignalaust þrotabú hönnunarfyrirtækisins ELM sem lokaði verslun sinni á Laugaveginum fyrir um tveimur árum.
Fyrirtækið var úrskurðað gjaldþrota í apríl 2012 en skiptum var lokið hinn 10. nóvember sl. Auk verslunarinnar á Laugaveginum rak ELM einnig verslun í Osló í Noregi auk þess sem vörurnar voru seldar í verslunum víða um heim. Fyrirtækið var stofnað árið 1999.
Í viðtali við Morgunblaðið á árinu 2010 sagði Kristín Ýr Hrafnkelsdóttir, þáverandi framkvæmdastjóri ELM, að hönnunin væri seld í um 100 verslunum í Bandaríkjunum og um 70 verslunum í Evrópu til viðbótar. Sagði hún þá að í framtíðaráætlunum fyrirtækisins væri lögð áhersla á opnun sérverslana sem myndu eingöngu bjóða upp á vörulínur ELM ásamt fylgihlutum.
Eigendur ELM voru aðalhönnuðir fyrirtækisins, Erna Steina Guðmundsdóttir, Lísbet Sveinsdóttir og Matthildur Halldórsdóttir, auk fjárfestingafélagsins Auðar Capital, sem í dag heitir Virðing, eftir sameiningu við það síðarnefnda.
Nefndi Kristín við Morgunblaðið að eftir hrun hefðu nýju bankarnir haft augu sín á öðru en að lána inn í nýjar fjárfestingar. Hún sagði fatahönnun kalla á langan binditíma í fjármögnun og það væri eins og bankarnir hefðu ekki skilning á geiranum. „Þó svo að lán til fatahönnunar séu í raun ekki ósvipuð afurðalánum sjávarútvegsfyrirtækja,“ sagði hún í samtali við Morgunblaðið.
Tekið skal fram að Kristín lét af störfum hjá ELM þó nokkru áður en fyrirtækið fór í þrot og starfaði því ekki þar þegar starfsemi var hætt.