Hagvöxturinn byggist á vexti ferðaþjónustunnar

Íslenska hagkerfið er á svipuðum slóðum og það var áður en síðasta þensluskeið hófst fyrir alvöru, um og eftir 2004. Hagkerfið stendur nú á tímamótum og nú reynir á hvort ríkisstjórn og Seðlabankinn hafi lært af mistökum fortíðarinnar.

Þetta kemur fram í Þjóðhag, ársriti Hagfræðideildar Landsbankans, sem kom út í gær.

,,Við stöndum frammi fyrir svipuðum áskorunum núna eins og þá. Framundan er mikill hagvöxtur, meiri en samræmist framleiðslugetu þjóðarbúsins og það mun óhjákvæmilega hafa í för með sér þenslu,“ segir Daníel Svavarsson, forstöðumaður hagfræðideildarinnar í ViðskiptaMogganum í dag. Hann segir stjórn ríkisfjármála og peningastefnuna ekki hafa spilað saman á síðasta þensluskeiði.