Sífellt minna selst á McDonald's

Sala hjá skyndibitakeðjunni McDonald's dróst enn meira saman í nóvember en spár höfðu gert ráð fyrir. Talið er að slakur árangur muni hafa áhrif á útkomu næsta ársfjórðungs en þetta er sjötti mánuðurinn í röð sem sala hefur dregist saman. 

Sala fyrirtækisins á heimsvísu dróst saman um 2,2 prósent í nóvember en gert hafði verið ráð fyrir að salan gæti minnkað um 1,7 prósent. 

Hlutabréf í McDonald's féllu um 3,5 prósent í verði í morgun í Kauphöllinni í New York. Forstjóri fyrirtækisins, Don Thompson, sem tók við fyrirtækinu í júlí 2012, hefur hrist nokkuð upp í hlutunum og veitt stjórnendum útibúa meira frjálsræði í rekstrinum og þannig reynt að bæta sölutölurnar. Þrátt fyrir þetta hefur sala ekki batnað á milli mánaða frá október 2013.

Þá hefur aukin áhersla verið lögð á ferskleika hráefna auk þess sem viðskiptavinum er frekar gefinn kostur á að setja máltíðina saman á sinn hátt, en það mun vera liður í að gera McDonald's samkeppnishæfari við aðra skyndibitastaði líkt og Subway og Chipotle.

Reuters greinir frá þessu.

• 1 blogg um fréttina

Bloggað um fréttina

• Wilhelm Emilsson: Um hamborgara