Malcolm Walker, forstjóri og stofnandi Iceland Foods verslunarkeðjunnar í Bretlandi, segir að fyrirtækið sé í „djúpum skít“ eins og sakir standa. Hann lofar því hins vegar að fyrirtækið muni ná sér á strik sem allra fyrst og koma sterkt til baka.
Hann segir að vegna þrýstings af hálfu þýskra heildsala hafi seinustu tvö ár verið verslunarkeðjunni afar erfið. Til marks um það hafi hagnaðurinn hvorki meira né minna en helmingast.
Fjallað er um málið á breska fréttavefnum Daily Post. Haft er eftir Walker að hann hlakki til að takast á við erfiðar áskoranir. „Seinustu tvö til þrjú ár hafa verið svo erfið og hagnaðurinn okkar á þessu ári hefur helmingast, þannig að við erum í djúpum skít,“ segir Walker en bendir þó á að fyrirtækið hafi tvisvar áður snúið til baka úr erfiðri, jafnvel vonlausri, stöðu.
Endurfjármögnun verslunarkeðjunnar lauk í september í fyrra en alls söfnuðust um 950 milljónir breskra punda í skuldabrétafútboði fyrirtækisins.
Malcolm Walker og lykilstjórnendur Iceland Foods keyptu 77% hlutafjár í fyrirtækinu árið 2012 af Landsbankanum og Kaupþingi. Lánin sem tekin voru vegna kaupanna voru greidd upp með endurfjármögnuninni.
Baugur átti áður Iceland Foods en fyrirtækið endaði hjá Landsbankanum að mestu eftir hrun.
Um 500 manns starfa í höfuðstöðvum Iceland og allt að 25 þúsund manns í verslunum keðjunnar víðs vegar um Bretland.