Viðsnúningur í rekstri MP banka

Hagnaður MP banka á síðari árshelmingi 2014 nam 494 milljónum króna samanborið við 159 milljóna króna tap á fyrri árshelmingi. Afkoma ársins 2014 er því 335 milljóna króna hagnaður eftir skatta, samanborið við 477 milljóna króna tap árið 2013.

Í afkomutilkynningu bankans segir að bætt afkoma í rekstri bankans á síðari hluta ársins 2014 endurspegli jákvæða þróun rekstrartekna bankans, sem jukust um 23% á milli árshelminga. Rekstrartekjur námu 1.836 milljónum króna á síðari árshelmingi, en voru 1.492 milljónir króna á fyrstu sex mánuðum ársins. Rekstrartekjur ársins í heild námu því 3.328 milljónum króna.

Umfangsmiklar hagræðingaraðgerðir

Hagrætt var umtalsvert í bankastarfsemi félagsins á árinu og áhersla lögð á sérhæfða bankaþjónustu. Vegna hagræðingaraðgerðanna lækkaði rekstrarkostnaður um tæpar 600 milljónir króna á milli ára og fór úr 3.669 milljónum króna árið 2013 niður í 3.071 milljónir króna árið 2014. Nemur lækkunin um 16% á milli ára og um 10% á milli árshelminga 2014.

Eigið fé bankans í lok árs 2014 nam 5.597 milljónum króna og heildareignir námu 49.344 milljónum króna. Eiginfjárhlutfall bankans hefur hækkað um 3,2 prósentustig á árinu og var 17,4% í árslok 2014, samanborið við 14,2% í árslok 2013. Hlutfall lausafjáreigna af heildareignum er 49% og lausafjárþekja (LCR) var 133% í lok ársins.

„Ég er mjög ánægður með árangurinn af umbreytingarferlinu sem við fórum af stað með á síðasta ársfjórðungi 2013. Við höfum náð að endurskipuleggja rekstur MP banka en á sama tíma bæði eflt hann og haldið fjárhagslegum styrk,“ er haft eftir Sigurði Atla Jónssyni, forstjóri MP banka, í tilkynningunni. „Það er gaman að sjá árangurinn af því starfi og viðvarandi hagnað af rekstri MP banka á seinni helmingi árs 2014.“

„Árangurinn ber að þakka frábæru starfsfólki sem hefur sýnt mikinn metnað og þrautseigju í gegnum þetta ferli. Við höfum náð að umbreyta viðskiptalíkani bankaþjónustu. Eignastýring bankans hefur náð framúrskarandi árangri með góðri ávöxtun og vexti eigna í stýringu. Markaðsviðskipti MP banka hafa náð góðum árangri þrátt fyrir krefjandi aðstæður á fjármálamarkaði,“ er haft eftir Sigurði.

Söluhagnaður vegna eigna í Litháen hafði áhrif

Þá segir að starfsemi bankans í markaðsviðskiptum og fyrirtækjaráðgjöf hafi gengið vel á árinu. Eignastýring bankans og dótturfélaganna Júpíters og FÍ fasteignafélags GP óx og fjármálatímaritið World Finance valdi MP banka fremstan á sviði eignastýringar á Íslandi árið 2014.

Hreinar vaxtatekjur lækkuðu um 7% á milli árshelminga. Þær námu 628 milljónum króna á síðari hluta ársins en voru 674 milljónir króna á fyrri hluta þess. Fyrir árið í heild námu hreinar vaxtatekjur 1.302 milljónum króna. Verulegur viðsnúningur varð í fjárfestingartekjum á milli árshelminga og námu þær 234 milljónum króna á síðari hluta ársins, m.a. vegna söluhagnaðar af eignum bankans í Litháen.

Bankinn kom að fjármögnun fjölmargra verkefna á árinu og námu útlán til viðskiptavina 22,3 milljörðum króna í árslok. Útlánasafnið er sagt traust og nam upphæð lána sem voru í 90 daga vanskilum, að teknu tilliti til sértækra niðurfærslna, 0,88% af útlánum. Krossvanskilahlutfall var 1,24% í lok árs.

MP banki er eini bankinn sem er að fullu í eigu einkaaðila s.s. lífeyrissjóða, fyrirtækja og einstaklinga. Hann var stofnaður árið 199 og hjá honum starfa um 70 starfsmenn.

Sigurður Atli Jónsson, forstjóri MP banka. Ómar Óskarsson

• Blogga um frétt