Hagnaður Vátryggingafélags Íslands eftir skatta dróst saman milli ára og nam rúmum 1,7 milljörðum króna samanborið við rúma 2,1 milljarða á síðasta ári. Í afkomutilkynningu segir að afkoma félagsins af vátryggingum hafi verið undir væntingum og þá sérstaklega afkoma af eignatryggingum og ökutækjatryggingum.
Þá var tjónaþungi ársins meiri en búist var við í upphafi árs og skýrist hann annars vegar af aukinni tjónatíðni og hins vegar af fjölgun stærri tjóna. Rekstrarkostnaður lækkaði á móti en stjórnendur hafa lagt áherslu á einföldun og aukna skilvirkni í rekstri.
Í afkomutilkynningu er greint frá því að félagið standi í umfangsmiklum fjárfestingum í innviðum þar sem unnið er að innleiðingu á staðlaðri lausn trygginga- og tjónakerfis í samstarfi við danska hugbúnaðarfyrirtækið TIA Technology A/S. Væntingar eru um að það muni skila ávinningi í bættum þjónustuferlum og hagkvæmni í rekstri.
Iðgjöld stóðu nánast í stað milli ára og námu um 16 milljörðum króna. Framlegð af vátryggingarekstri var 46 milljarðar. Rekstrarkostnaður lækkaði frá fyrra ári og var kostnaðarhlutfallið 21,4%. Fjármunatekjur námu 2,4 milljörðum og drógust saman frá fyrra ári er þær námu um 2,6 milljörðum. Heildareignir jukust þá lítillega og námu 46,5 milljörðum samanborið við 46,4 milljarða í fyrra.
Eigið fé félagsins dróst saman milli ára og nam 15,9 milljörðum samanborið við 16,6 milljarða á árinu 2013 og var eiginfjárhlutfallið 34,3% í lok árs.
Stjórn félagsins hefur lagt til að félagið greiði hluthöfum arð sem nemur kr. 1,03 á hlut. Heildarfjárhæð arðgreiðslunnar er um 2.500 milljónir króna fyrir árið 2014.