Viðskipti | mbl | 4.3.2015 | 11:24

EDDA kaupir fjórðungshlut í Domino‘s

: f.v. Baldur Már Helgason sjóðsstjóri framtakssjóða Virðingar, Hannes Frímann Hrólfsson forstjóri Virðingar og Birgir Örn Birgisson framkvæmdastjóri Domino‘s á Íslandi. mbl.is

Framtakssjóðurinn EDDA, sem rekinn er af verðbréfafyrirtækinu Virðingu, hefur keypt fjórðungshlut í Pizza-Pizza ehf., sérleyfishafa Domino‘s Pizza International á Íslandi.

Domino‘s á Íslandi á meirihluta í sérleyfishafa Domino‘s í Noregi en þar hafa á undanförnum mánuðum verið opnaðir þrír staðir í samstarfi við norska meðeigendur, segir í fréttatilkynningu. Aðkoma EDDU verður m.a. nýtt til að fjármagna frekari vöxt í Noregi auk þess að undirbúa opnun Domino‘s staða í Svíþjóð en félagið er einnig með sérleyfi fyrir Domino‘s í Svíþjóð.

Aðrir eigendur Pizza-Pizza ehf. eru Birgir Þ. Bieltvedt stjórnarformaður félagsins og eiginkona hans Eygló Björk Kjartansdóttir, sem einnig situr í stjórn Pizza-Pizza ehf., Högni Sigurðsson, Birgir Ö. Birgisson framkvæmdastjóri og nokkrir aðrir lykilstjórnendur Domino‘s á Íslandi.

Kaupin eru gerð með fyrirvara um samþykki Samkeppniseftirlitsins og sérleyfisveitanda Domino´s.

Haft er eftir Birgi Þ. Bieltvedt, stjórnarformanni Pizza-Pizza, í fréttatilkynningu að eftir að nýir eigendur komu að Domino‘s á Íslandi árið 2011 hafi orðið mikill viðsnúningur í rekstri félagsins. „Ætlunin er að nýta góða reynslu af rekstri Domino‘s á Íslandi við uppbyggingu Domino‘s í Noregi og það er mikill kostur að fá um leið fjárhagslega sterkan meðeiganda að félaginu til að styðja stjórnendur í þeirri vegferð.“

Um 600 starfsmenn

Pizza-Pizza er rekstraraðili Domino‘s á Íslandi auk þess að eiga meirihluta í rekstraraðila Domino‘s í Noregi. Pizza-Pizza opnaði fyrsta Domino‘s pizzastaðinn á Íslandi árið 1993 og rekur í dag 19 verslanir á Íslandi. Um 600 starfsmenn starfa hjá Domino‘s hér á landi, ríflega helmingur þeirra í hlutastarfi.

Edda slhf. er 5 milljarða króna framtakssjóður í rekstri verðbréfafyrirtækisins Virðingar hf. Hluthafar eru rúmlega 30, lífeyrissjóðir og aðrir fagfjárfestar. Fjárfestingarstefna Eddu er að fjárfesta í óskráðum félögum með trausta rekstrarsögu. Sjóðurinn var stofnaður árið 2013 en fyrir á sjóðurinn 40% hlut í öryggisfyrirtækinu Securitas.

Virðing er alhliða verðbréfafyrirtæki sem veitir fjárfestingatengda þjónustu á sviði eignastýringar, markaðsviðskipta, fyrirtækjaráðgjafar og reksturs framtakssjóða. Virðing hefur starfsleyfi sem verðbréfafyrirtæki og starfar undir eftirliti Fjármálaeftirlitsins (FME).