Hagvöxturinn 1,9%

Landsframleiðsla jókst að raungildi um 1,9% á árinu 2014 og hefur ekki verið hærri að raungildi frá árinu 2008. Innanlandsneyslan dregur hagvöxtinn áfram en þjóðarútgjöld jukust um 5,3%.

Einkaneysla jókst um 3,7%, samneysla um 1,8% og fjárfesting jókst um 13,7%. Útflutningur jókst um 3,1% á sama tíma og innflutningur jókst 9,9% þannig að þrátt fyrir verulegan afgang af vöru- og þjónustuviðskiptum á liðnu ári, eða 128 milljarða króna, dró utanríkisverslun hagvöxtinn niður.

Fara þarf aftur til ársins 2006 til að sjá meiri vöxt í  fjárfestingu en á síðasta ári. Hún jókst um 13,7% - þar af var um 15% vöxtur bæði í íbúðafjárfestingu og hjá atvinnuvegunum.

Halli á launa- og fjáreignatekjum frá útlöndum er fremur lítill, annað árið í röð, samkvæmt bráðabirgðatölum sem Seðlabankinn hefur nú birt. Það ásamt  afgangi af vöru- og þjónustuviðskiptum leiddi til jákvæðs viðskiptajafnaðar á árinu 2014. Hann nam rúmum 88 milljörðum króna, 4,4% af landsframleiðslu á árinu. Til samanburðar var viðskiptajöfnuður jákvæður um 125 milljarða árið 2013, segir í frétt Hagstofu Íslands.

Viðskiptakjör bötnuðu um 1,9% á árinu 2014. Það ásamt jákvæðum viðskiptajöfnuði varð til þess að þjóðartekjur jukust meira en sem nam vexti landsframleiðslu eða um 3,3%. Árið 2013 jukust þjóðartekjur um 11,7%.

Landsframleiðslan á 4. ársfjórðungi 2014 jókst um 3% borið saman við 4. ársfjórðung 2013. Á sama tíma jukust þjóðarútgjöld, sem eru samtala neyslu og fjárfestingar, um 8,2%. Einkaneysla jókst um 4,5%, samneysla um 2,1% og fjárfesting um 14,2%. Útflutningur dróst saman um 2,9% á sama tíma og innflutningur jókst um 6,7%.

Árstíðaleiðrétt landsframleiðsla jókst um 0,2% milli 3. og 4. ársfjórðungs 2014. Þar af jókst einkaneysla um 1,6% og samneysla um 0,7% en fjárfesting dróst saman um 6,9%.

 Einkaneysla 52,6% af landsframleiðslu

Einkaneysla sem hlutfall af landsframleiðslu var 52,6% á liðnu ári. Í sögulegu samhengi hefur þetta hlutfall verið mjög lágt síðustu sjö árin. Samneysla var 24,3% af landsframleiðslu sem er svipað hlutfall og verið hefur undanfarinn áratug en til samanburðar var þetta hlutfall um eða undir 20% á árabilinu 1980- 1990.

Hlutfall fjárfestingar af landsframleiðslu var 16,6% á liðnu ári og hefur þetta hlutfall verið síðustu sex árin í sögulegu lágmarki. Sambærilegt hlutfall fyrir OECD ríkin í heild hefur verið um eða rétt undir 20% undanfarinn aldarfjórðung. Sjötta árið í röð er afgangur af viðskiptum Íslands við útlönd.

Afgangur vöru- og þjónustuviðskipta nam 6,4% af landsframleiðslu á liðnu ári og 8,2% á árinu 2013. Á árunum 1998–2008 var halli á þessum viðskiptum að árinu 2002 undanskildu og framlagið til landsframleiðslu því neikvætt öll árin.

Fréttin í heild

• 1 blogg um fréttina

Bloggað um fréttina

• Páll Vilhjálmsson: 2% hagvöxtur og engar öfgatilraunir