Grikkir hafa aðeins sex virka daga til þess að skila tillögum um úrbætur í ríkisfjármálum til þess að hægt verði að greiða fyrir frekari lánveitingum til landsins.
Fjármálaráðherrar evruríkjanna vilja fá tillögurnar fyrir fund þeirra sem fer fram þann 24. apríl næstkomandi en að teknu tilliti til páskafrídaga grísku rétttrúnaðarkirkjunnar eru aðeins sex dagar til stefnu.
Endanlegur listi yfir úrbætur þarf að hljóta náð fyrir augum 19 fjármálaráðherra evruríkjanna áður en frekari lánagreiðslur til Grikkja verða samþykktar.
Grísk stjórnvöld áttu í dag að greiða 460 milljóna evra afborgun til Alþjóðagjaldeyrissjóðsins og að því er fram kemur í frétt BBC hefur það verið gert. Gjalddagi á nokkrum öðrum stórum afborgunum eru þá einnig á komandi vikum.
Alexis Tsipras, forsætisráðherra Grikklands, hefur sagt að listi yfir úrbætur sé tilbúinn en samningaviðræður standa hins vegar enn yfir um endanlegan lista.