Fimm hundruð milljón króna sekt, sem var lögð á Valitor vegna alvarlegra samkeppnisbrota, var lækkuð um 100 milljónir króna í Hérðasdómi Reykjavíkur í morgun. Samkeppniseftirlitið lagði sektina á fyrirtækið haustið 2013.
Valitor krafðist aðallega ógildingu á sektarákvörðuninni en til vara lækkunar á sektargreiðslunni. Héraðsdómur féllst því á varakröfuna.
Halldór Brynjar Halldórsson, lögmaður Valitors, hafði ekki kynnt sér dóminn þegar mbl náði af honum tali og ekki liggur því fyrir á hverju niðurstaðan byggði.
Haustið 2013 staðfesti áfrýjunarnefnd samkeppnismála 500 milljón króna sekt á Valitor vegna alvarlegra samkeppnislagabrota. Í brotinu fólst m.a. að Valitor misnotaði trúnaðarupplýsingar um söluaðila í viðskiptum við keppinauta sína í færsluhirðingu sem félagið hafði aðgang að vegna stöðu sinnar í útgáfu VISA greiðslukorta hér á landi.
Háttsemi Valitors fólst í því að fyrirtækið verðlagði þjónustu sína í færsluhirðingu vegna debetkorta undir breytilegum kostnaði á árunum 2007 og 2008. Með þessari undirverðlagningu var félagið líklegra til að fá samninga við söluaðila um færsluhirðingu vegna kreditkorta sem talin er arðsamari þjónusta. Var umfang þessarar undirverðlagningar verulegt. Fól háttsemin einnig í sér brot á 54. gr. EES-samningsins.
Samkeppniseftirlitið komst einnig að þeirri niðurstöðu að Valitor hefði brotið gegn tveimur skilyrðum sem félagið hafði skuldbundið sig til að hlíta með sátt við Samkeppniseftirlitið sem birt var í ákvörðun nr. 4/2008.
Frétt mbl.is: Staðfestir 500 milljón króna sekt á Valitor