Það kom mörgum á óvart þegar fjárfestirinn Árni Oddur Þórðarson fór úr stjórn Marels til að taka sæti forstjórans. Hann segir að ekki hafi verið samhljómur milli stjórnar og stjórnenda um áherslur í rekstrinum.
Ágreiningurinn stóð einkum um of flókið skipulag í rekstrinum þar sem áherslan var á að reka margar einstakar einingar í stað þess að vera með eitt fyrirtæki, að því er fram kemur í viðtali við Árna Odd í ViðskiptaMogganum í dag.
„Við sem vorum í stjórninni töldum að það mætti einfalda þennan rekstur til muna. Við vitum að framtíðarvöxturinn er á nýmörkuðum en flækjustigið hefði orðið alltof mikið ef við hefðum opnað fleiri verksmiðjur þar, áður en heimagarðurinn væri einfaldaður.“