Viðskipti | mbl | 20.5.2015 | 13:29

Fyrstu kaupendur koma sterkir inn

mbl.is/Þorvaldur Örn Kristmundsson

„Töluverð hækkun varð á íbúðaverði á höfuðborgarsvæðinu á síðastliðnu ári en byggingamarkaður er hægt og sígandi að ná sér á strik aftur og vísbendingar eru um að íbúðamarkaðurinn sé að sigla í ákveðið jafnvægi þar sem íbúðaframboð mun aukast á næstu misserum en engu að síður ríkir töluverð óvissa á markaðnum.“

Þetta kemur fram í fréttatilkynningu frá Íslandsbanka vegna útkomu nýrrar skýrslu Reykjavík Economics um fasteignamarkaðinn á höfuðborgarsvæðinu sem unnin var fyrir bankann. Þar segir ennfremur að heildarvelta á íbúðamarkaðinum á síðasta ári hafi numið 257 milljörðum króna sem sé 16% hækkun að nafnvirði frá árinu á undan. Íbúðaverð á höfuðborgarsvæðinu hafi hækkað um 8,8% á síðasta ári. Fjölbýli hafi hækkað um 9% í verði en sérbýli um 7,7%.

Ekki hefur verið byggt nægilega mikið á höfuðborgarsvæðinu til þess að mæta náttúrulegri íbúafjölgun innan þess. „Samtals voru 954 íbúðir fullgerðar á höfuðborgarsvæðinu á árinu 2014 sem er 203 íbúðum meira en árið 2013. Að jafnaði hafa tæplega 1200 íbúðir verið fullgerðar árlega á árabilinu 1983-2014. Um síðustu áramót voru 1813 íbúðir í byggingu á höfuðborgarsvæðinu sem eru 364 færri íbúðir en um áramótin 2013. Byrjað var á 570 íbúðum á síðasta ári sem er vel undir langtíma meðaltali.“

Ennfremur kemur fram í skýrslunni að skuldastaða heimila hafi batnað nokkuð með minnkandi atvinnuleysi og auknum kaupmætti. Bólumyndun á fasteignamarkaði á höfuðborgarsvæðinu sé takmörkuð en íbúðarhúsnæði sé engu að síður orðið dýrt miðsvæðis í Reykjavík. Þá sé unga fólkið í auknum mæli að komast inn á húsnæðismarkaðinn.

„Staða fyrstu kaupenda hefur batnað þar sem þeir eru nú orðnir yfir 20% kaupenda á höfuðborgarsvæðinu en voru aðeins 13,6% að meðaltali frá því 2008. Meðalaldur fyrstu kaupenda hefur hækkað og er í dag 29 ár sem er svipað og í Bretlandi. Íslandsbanki hóf á síðasta ári að veita þeim sem kaupa sína fyrstu íbúð sérstakt aukalán til að auðvelda kaupin. Viðtökurnar hafa verið góðar og fer eftirspurn eftir þeim vaxandi.“