Vöruskiptin í maí voru óhagstæð um 2,9 milljarða króna en á sama tíma í fyrra voru þau hagstæð um 5 milljarða króna. Á fyrstu fimm mánuðum ársins er þó 2,3 milljarða afgangur af vöruskiptum við útlönd. Vöruskiptajöfnuðurinn er mjög svipaður og á sama tíma í fyrra þar sem hann var hagstæður um 2,2 milljarða.

Þetta kemur fram hjá Hagstofu Íslands. Í maímánuði voru fluttar út vörur fyrir 54,3 milljarða króna og inn fyrir 57,2 milljarða króna fob eða 60,9 milljarða króna cif. 

Fyrstu fimm mánuði ársins 2015 voru fluttar út vörur fyrir rúma 276,2 milljarða króna en inn fyrir tæpa 274 milljarða króna fob eða 292,0 milljarða króna cif. Afgangur var því af vöruskiptum við útlönd sem nam 2,3 milljörðum króna, reiknað á fob-verðmæti, en á sama tíma árið áður voru þau hagstæð um 2,2 milljarða á gengi hvors árs.

Iðnaðarvörur 55,2%

Fyrstu fimm mánuði ársins 2015 var verðmæti vöruútflutnings 48,7 milljörðum eða 21,4% hærra á gengi hvors árs en á sama tíma árið áður. Iðnaðarvörur voru 55,2% alls útflutnings og var verðmæti þeirra 31,0% hærra en á sama tíma árið áður, aðallega vegna útflutnings á áli.

Sjávarafurðir voru 40,7% alls vöruútflutnings og var verðmæti þeirra 17,4% hærra en á sama tíma árið áður, aðallega vegna útflutnings á fiskimjöli.

Flugvélar höfðu áhrif

Fyrstu fimm mánuði ársins 2015 var verðmæti vöruinnflutnings 48,7 milljörðum eða 21,6% hærra á gengi hvors árs en á sama tíma árið áður, aðallega vegna hrá- og rekstrarvöru og flugvéla.

• Blogga um frétt