Puerto Rico rambar á barmi greiðslufalls og talið er að lausafjárþurrð gæti komið upp þann 30. september næstkomandi.
Karabíska eyjan sem hefur verið bandarískt sjálfstjórnarsvæði frá árinu 1898, situr föst í skuldafeni en líkt og mbl hefur áður greint frá hefur fjármálaráðherra Bandaríkjana, Jacob Lew, sagt ráðamönnum í Púertó Ríkó að þeir geti ekki búist við aðstoð frá Bandaríkjunum.
Púertó Ríkó hefur fjármagnað hallarekstur með erlendri lántöku um tíma og skulda nú alls um 72 milljarða Bandaríkjadala. Gjalddagi er á morgun, þann 1. júlí, og takist heimamönnum ekki að fjármagna 630 milljóna dollara afborgun blasir við greiðslufall.
Í morgunpósti IFS greiningar kemur fram að samansafn af 35 bandarískum vogunarsjóðum eigi nú í samningaviðræðum við stjórnvöld. Teikn munu vera á lofti um skuldabréfafjármögnun tengda skattlagningu á olíu. Í frétt Bloomberg segir að þingmenn í Púertó Ríkó hafi í gær heitið endurgreiðslu lána. Til stendur að samþykkja 9,8 milljarða dollara fjárlög fyrir næsta ár en um 15 prósent þess á að fara í endurgreiðslur lána og vaxtagreiðslur.
Viðskipti með Ríkisskuldabréf Puerto Rico á gjalddaga 2035 eru nú að skipta um hendur á verðinu 68.5, á meðan nafnverð er 100.