Grískir bankar voru opnaðir aftur í dag eftir að hafa verið lokaðir í þrjár vikur. Tíu prósent hækkun á söluskatti tekur einnig gildi í dag og búist er við miklum verðhækkunum í landinu.
Söluskatturinn var eitt þeirra skilyrða sem lánadrottnar settu fyrir frekari lánveitingum en hann hækkar úr 13% í 23%.
Grískum bönkum var lokað hinn 29. júní síðastliðinn eftir að ríkisstjórnin boðaði til þjóðaratkvæðagreiðslu um aðhaldstillögur lánadrottna. Bankarnir hafa því verið lokaðir í þrjár vikur og á meðan hefur almenningur einungis getað tekið út sextíu evrur, eða um 8.800 krónur, á dag.
Þrátt fyrir að bankarnir verði opnaðir aftur eru takmarkanir á starfseminni. Ströng skilyrði hafa verið sett fyrir millifærslu peninga til útlanda auk þess sem takmarkað hefur verið hverjir geta stofnað bankareikninga í Grikklandi.
Reglur um daglegar hámarksúttektir breytast jafnframt í dag þar sem Grikkir geta nú vikulega tekið út 420 evrur, eða um 62 þúsund krónur. Það jafngildir um 8.800 krónum á dag og breytist dagleg hámarksupphæð því ekki. Enda er breytingin einungis gerð til þess að stytta raðir við hraðbankana þar sem fólk þarf ekki að nýta heimildina að fullu á hverjum degi.
Grískur arkitekt sagði í samtali við BBC að það breytti hins vegar litlu fyrir rekstur hans að bankarnir væru að opna aftur. Hann sagði stærsta vandamálið liggja í því að hann gæti ekki greitt birgjum. Með því áframhaldi hefði hann að lokum engar vörur til þess að selja.
Það hefur reynst Grikkjum dýrkeypt að hafa bankana lokaða nú í þrjár vikur. Samkvæmt skýrslu, sem gríska dagblaðið Kathimerini greindi frá í morgun, hefur gríska hagkerfið orðið af um þremur milljörðum evra vegna lokana bankanna.
Evrópski seðlabankinn ákvað fyrr í vikunni að auka lausafjárstuðning sinn við gríska banka um 900 milljónir evra. Gríska bankakerfið hefur verið háð þessum seðlabankalánum á undanförnum mánuðum, enda eru fjármálamarkaðir lokaðir fyrir bönkunum þar í landi.
Vinstri stjórn Tsipras hefur samþykkt að hækka skatta, gera breytingar á lífeyriskerfi landsins og auka einkavæðingu í landinu. Áður hafði stjórnin neitað slíku í viðræðum um neyðarpakka upp á 86 milljarða evra fyrir næstu þrjú ár í viðræðum við kröfuhafa.