Skífan opnuð aftur

Fyrir rúmum fjórum mánuðum var verslunum Skífunnar í Kringlunni og Smáralind lokað. Líkt og Guðmundur Magnason, eigandi Magna versl­ana ehf. sem á og rek­ur Skíf­una, Gamestöðina og Heim­kaup.is, sagði í samtali við mbl voru verslanirnar einfaldlega orðnar of litlar og vöruúrvalið hafði farið minnkandi ár frá ári.

Titlum í boði fækkaði og um leið ástæðum tónlistarunnenda til að heimsækja verslanirnar. 

Í dag opnar Skífan hins vegar vefverslun á vef Heimkaup.is. Í tilkynningu frá Skífunni segir að í vefversluninni sé nú að finna eitt landsins mesta úrval af geisladiskum og vínilplötum.

„Tónlistin fær sífellt minna pláss í hillum verslana en tónlistarunnendur gera hins vegar alltaf meiri og meiri kröfur um úrval og fjölbreytni. Í nágrannlöndunum hefur sala á þessum vörum flust á netið, en í vefverslunum þurfa diskarnir ekki rándýrt verslunarpláss. Sem dæmi má nefna að í könnun sem Royal Mail gerði í Bretlandi í apríl s.l. var geisladiskurinn í 7. sæti þegar fólk var spurt hvers konar vörur það verslaði á netinu. Við eigum því von á góðum móttökum,“ er haft eftir Guðmundi í tilkynningu.

Heimkaup.is sér svo um að koma diskum til kaupenda en heimsending er frí ef pantað er fyrir fjögur þúsund krónur eða meira.

Frétt mbl.is: Skífunni lokað eftir 40 ár

Frá vefverslun Skífunnar

• Blogga um frétt