Hagnaður Deutsche Bank nam 818 milljónum evra á öðrum fjórðungi ársins og meira en þrefaldaðist á milli ára. John Cryan, nýr bankastjóri bankans, lofar því þó að endursoða rekstur bankans og draga úr rekstrarkostnaði, sem hann segir „óviðunandi háan“.
Þá jukust tekjur félagsins um 17% á milli ára og numu 9,2 milljörðum evra á ársfjórðunginum.
Cryan, sem tók við bankastjórastarfinu í byrjun júlímánaðar, sagði að afkoman endurspeglaði ekki getu bankans.
Mikið verk væri fyrir höndum að draga úr rekstarkostnaði og hreinsa efnahagsreikninginn.
Anshu Jain og Jurgen Fitschen deildu með sér bankastjórastólnum áður en Cryan tók við starfinu. Þeir þykja hafa glatað trausti hluthafa að undanförnu.
Fyrr í sumar kynntu þeir nýja stefnu sem er ætlað að auka ávinning hluthafa, en rekstur bankans hefur gengið erfiðlega að undanförnu. Benda sérfræðingar meðal annars á að stutt sé síðan bankinn var sektaður um 2,5 milljarða dala vegna aðildar sinnar að Libor-svindlinu svonefnda.
Þá greiddu 39% hluthafa gegn sitjandi framkvæmdastjórn á aðalfundi bankans fyrir tveimur vikum. Kölluðu margir fjárfestar í kjölfarið eftir að Jain og Fitschen segðu af sér.
Jain lét af störfum í lok júnímánaðar en Fitschen verður bankastjóri með Cryan fram að hluthafafundi bankans í maí á næsta ári.