Hagnaður Marels nam 19,5 milljónum evra á öðrum fjórðungi ársins og jókst verulega á milli ára, en hann var 0,8 milljónir króna á sama tímabili í fyrra.
Tekjur félagsins jukust jafnframt á tímabilinu og námu 218,3 milljónum evra, borið saman við 169,8 milljónir evra á sama tíma í fyrra.
EBITDA félagsins, þ.e. rekstrarhagnaður fyrir afskriftir, fjármagnsliði og skatta, nam 38,1 milljón evra á ársfjórðunginum sem er um 17,5% af tekjum, en EBITDA var 13,0 milljónir evra á sama tímabili í fyrra.
Þá nam EBIT, rekstrarhagnaður, 28,5 milljónir evra á tímabilinu, sem er 13,1% af tekjum. Rekstrarhagnaðurinn var 3,6 milljónir evra á öðrum ársfjórðungi 2014.
Handbært fé frá rekstri fyrir fjármagnsliði og skatta nam 23,7 milljónum evra á öðrum ársfjórðungi 2015, borið saman við 20,4 milljónir evra á sama tíma í fyrra. Nettó vaxtaberandi skuldir í lok fjórðungsins námu 156,0 milljónum evra, en 204,5 milljónir evra á öðrum ársfjórðungi í fyrra.
Pantanabókin stóð í 165,9 milljónum evra í lok annars ársfjórðungs 2015 samanborið við 178 milljónir evra í lok fyrsta ársfjórðungs 2015.
Í tilkynningu frá félaginu segir að gott jafnvægi sé á milli pantana á öðrum ársfjórðungi á milli uppbyggingaverkefna, endurnýjunarverkefna og viðhaldsverkefna og söluverkefni dreifist vel á heimsvísu. Pantanastaða í fisk- og kjúklingaiðnaði sé góð en markaðsaðstæður í áframvinnslu og kjöti hafi gefið lítillega eftir.
Búast má við að tekjur í þriðja ársfjórðungi verði lægri en í öðrum ársfjórðungi vegna árstíðabundinna áhrifa og tímasetningu á afhendingu búnaðar til viðskiptavina. Heilt yfir eru markaðsaðstæður góðar.
Árni Oddur Þórðarson, forstjóri Marels, segir að fyrri hluti ársins hafi einkennst af miklum tekjuvexti og afkomubata. „Tekjur félagsins á fyrstu sex mánuðum ársins nema 428 milljónum evra og er rekstrarhagnaður félagsins 12,5% af tekjum, að teknu tilliti til einskiptisliða. Við erum stolt af árangrinum sem byggir á sterku vöruframboði, nánum tengslum við viðskiptavini og góðum markaðsaðstæðum.
Með nýsköpun og markvissri markaðssókn ætlar Marel sér að viðhalda stöðu félagsins sem leiðandi aðila á heimsvísu í þróun og framleiðslu á háþróuðum búnaði og kerfum til vinnslu á fiski, kjöti og kjúklingi. Fjárhagsstaða félagsins er firna sterk sem gefur okkur ýmis tækifæri til vaxtar,“ segir Árni Oddur.