Lyfjafyrirtækið Alvogen hefur fengið samþykki bandarísku matvæla- og lyfjastofnunarinnar til að markaðssetja samheitalyfja útgáfu af alzheimerslyfinu Exelon sem gefið er í plástraformi. Þar sem Alvogen var fyrst til að sækja um markaðsleyfi á lyfinu, hefur fyrirtækið fengið 180 daga einkarétt á sölu þess.
Í tilkynningu frá Alvogen segir að markaðssetning lyfsins sé sú stærsta í sögu fyrirtækisins en árleg sala plástursins í Bandaríkjunum er um 52 milljarðar króna. Lyfið verður markaðssett í þremur styrkleikum og dreifing lyfsins er hafin.
Exelon plásturinn (rivastigmine) hefur verið notaður við meðhöndlun á minnisglöpum sem tengjast Alzheimers sjúkdómnum sem er í dag sjötta algengasta dánarorsök í Bandaríkjunum. Áætlaður kostnaður bandaríska heilbrigðiskerfisins, vegna sjúkdómsins, er talinn vera um 226 milljarðar bandaríkjadala.
Í tilkynningu segir að markaðssetning Alvogen á nýju samheitalyfi muni lækka lyfjaverð og gefur fleiri sjúklingum möguleika á að njóta meðferðar.
Haft er eftir Róberti Wessman forstjóra Alvogen að það sé ánægjulegt að tekist hafi að fá einkasölurétt á lyfinu í Bandaríkjunum sem sé stærsti lyfjamarkaður heims. „Markaðssetning lyfsins er sú stærsta í sögu Alvogen og styrkir enn frekar vaxandi starfsemi okkar í Bandaríkjunum. Frá árinu 2009 hefur Alvogen sett 23 lyf á markað í Bandaríkjunum en þetta er í fyrsta sinn sem okkur tekst að vera á undan samkeppninni með nýtt samheitalyf þar í landi, sem er eitthvað sem öll fyrirtæki stefna að. Árangurinn má meðal annars þakka öflugu þróunarstarfi okkar í Bandaríkjunum.“
Alvogen er alþjóðlegt samheitalyfjafyrirtæki með starfsemi í 35 löndum. Bandaríkjamarkaður er stærsti einstaki markaður fyrirtækisins en meðal annarra markaða má nefna Suður-Kóreu, Rúmeníu, Búlgaríu, Tævan, Kína, Ungverjaland, Rússland og Japan. Á Íslandi starfa rúmlega 80 manns hjá Alvogen og systurfyrirtækinu Alvotech. Fyrirtækin vinna nú að byggingu nýs Hátækniseturs í Vatnsmýrinni sem verður fullbúið í ársbyrjun