Svissnenski súkkulaðiframleiðandinn Lindt & Spruengli hafði betur en þýski sælgætisframleiðandinn Haribo fyrir dómstólum. Síðarnefnda fyrirtækið krafðist þess að Lindt myndi hætta framleiðslu á gullbangsa úr súkkulaði
Haribo taldi framleiðsluna brjóta gegn vörumerkjarétti sínum og vísaði til „Gullbangsa“ eða „Golgbären“ vörumerkisins.
Haribo hóf framleiðslu á gúmmíböngsum á sjöunda áratugnum en súkkulaðibangsi Lindt kom á markað árið 2011. Haribo stefndi Lindt árið 2012 og sagði vörurnar of líkar og taldi að það myndi rugla neytendur.
Þýskur undirdómstóll hafði áður úrskurðað Haribo í vil en áfrýjunardómstóll komst að annarri niðurstöðu.
Lindt hélt því fram að súkkulaðibangsinn væri byggður á súkkulaði-kanínunni svokölluðu, en hún er pökkuð inn í gylltan álpappír og með bjöllu um hálsinn. Kanínan hefur verið framleidd frá árinu 1952.
Í niðurstöðunni sagði að vöru Lindt mætti lýsa á margan hátt og að ekki þyrfti endilega að nota heitið „gullbangsi“. Í niðurstöðunni sagði einnig að koma þyrfti í veg fyrir einokun á hönnun í framleiðslu á þrívíddarhönnuðum varningi.
Í síðustu viku hafnaði Evrópudómstóllinn umleitan Nestlé, sem hefur barist fyrir því að fá hið „fjögurra fingra“ útlit súkkulaðistykkisins KitKat skrásett vörumerki.
Frétt mbl.is: Þykir ekki nægilega auðkennandi
BBC greinir frá.