Hlutafé aukið hjá Arctic Trucks

Hlutafé Arctic Trucks jeppamiðstöðvarinnar hefur verið aukið um 470 milljónir króna sem verða notaðar til frekari uppbyggingar erlendis.

Að aukningunni standa núverandi hluthafar ásamt Frumtaki 2, sem er fjárfestingasjóður í eigu íslenskra lífeyrissjóða og fjármálastofnana.

Arctic Trucks rekur starfsstöðvar á Íslandi, í Noregi og Sameinuðu arabísku furstadæmunum, en hefur auk þess gert sérleyfissamninga við aðila í Rússlandi, Bretlandi, Finnlandi, Póllandi, Hollandi og Suður-Afríku um framleiðslu, sölu og þjónustu við bifreiðar Arctic Trucks. Á annað hundrað manns starfa undir merkjum fyrirtækisins víða um heim.