Evrópska tískuhúsið Balenciaga hefur ráðið hönnuðinn Demna Gvasalia sem nýjan listrænan stjórnanda tískuhússins. Gvasalia tekur við starfinu af Alexander Wang og verður fyrsta sýning han fyrir Balenciaga í mars á næsta ári. Gvasalia hefur vakið gríðarlega athygli og vinsældir fyrir vörumerki sitt Vetements.
Greint var frá þessu í morgun en í dag lýkur vor/sumar sýningunni í París. Balenciaga var stofnað af spænska hönnuðinum Cristóbal Balenciaga en er nú í eigu franska stórfyrirtækisins Kering.
Wang kynnti síðustu sýningu sína fyrir Balenciaga í París á föstudag en hann starfaði fyrir tískuhúsið í þrjú ár.
Gvasalia mun áfram leiða listræna stjórnun hjá Vetements en vörumerkið setti hann á laggirnar árið 2013. Hann hefur einnig starfað fyrir Maison Martin Margiela og Louis Vuitton.