Tölvurisinn Google er nú stoltur eigandi lénsins abcdefghijklmnopqrstuvwxyz.com. Í ágúst stofnaði Google móðurfélagið Alphabet, eða sem útleggst stafrófið á íslensku, en það heldur utan um allar einingar samstæðunnar.
Á sama tíma opnaði fyrirtækið vefsíðuna abc.xyz og í kjölfarið hefur mikil sókn verið í stafrófstengd lén.
Þetta nýja tuttugu og sex stafa lén Google var áður í einkaeigu en kaupverðið hefur ekki verið gefið upp. Í svari við fyrirspurn Business Insider um kaupin segir talsmaður Google að þeir hefðu áttað sig á því að nokkrir stafir gleymdust í léninu abc.xyz og að þeir væru bara að sýna vandvirkni.
Síðan tengd léninu er hins vegar ekki virk í dag.