Minni verðbólga á evrusvæðinu

Verðbólga á evrusvæðinu reyndist lægri í desember en spáð hafði verið samkvæmt tölum frá Eurostat, hagstofu Evrópusambandsins, sem birtar voru í dag. Verðbólgar mældist 0,2% í desember en reiknað hafði verið með að hún yrði 0,3%.

Fram kemur í frétt AFP að þetta sé talsvert langt frá verðbólgumarkmiði Evrópska seðlabankans sem sé um eða rétt undir 2% og bendi til þess að ítrekaðar tilraunir bankans til þess að auka verðbólguna hafi til þessa ekki skilað tilætluðum árangri.

Ennfremur segir að tölurnar nú auki þrýsting á Evrópska seðlabankann að grípa til frekari aðgerða til þess að auka verðbólgu. Lítil verðbólga kemur sér vel fyrir neytendur til skemmri tíma segir í fréttinni en til lengri tíma leiði hún til vítahrings minni eftirspurnar og færri starfa. 

Verðhjöðnun stuðli þannig að því að neytendur fresta kaupum á vörum í von um enn lægra verð sem leiði til þess að fyrirtæki fresti fjárfestingum.

• 1 blogg um fréttina

Bloggað um fréttina

• Heimssýn: Seðlabanki ESB getulaus og í tómu tjóni