Venesúela á barmi óðaverðbólgu

481 prósenta verðbólgu má vænta í Venesúela á þessu ári og 1642% á því næsta samkvæmt nýjustu spám Alþjóðagjaldeyrissjóðsins. Þá spáir AGS 17 prósenta atvinnuleysi í landinu í ár og 21 prósenta atvinnuleysi á næsta ári.

„Venesúela er á barmi óðaverðbólgu,“ segir Kathryn Rooney Vera, forstöðumaður greiningardeildar BullTick Capital Markets. Verðbólga er nú þegar mikil í Venesúela. Samkvæmt upplýsingum frá ríkisstjórn landsins var verðbólga í landinu 141 prósent frá janúar til september á síðasta ári.

Sósíalistar ráða ríkjum í Venesúela og hefur forseti landsins, Nicolas Maduro, haldið áfram á sömu braut og forveri hans í starfi með miklum ríkisútgjöldum og dýru velferðarkerfi.

Frá þessu er greint á vef CNN en þar segir að landið hafi ekki efni á þessum miklu ríkisútgjöldum. Lágt olíuverð hefur sannarlega sett strik í reikning þjóðarbúsins, en um 95 prósent af öllum útflutningi landsins er olía.

• Blogga um frétt