Álfheiður: Félagið stofnað fyrir Kaupþing
Setja bókamerki
Sigurmar K. Albertsson, hæstaréttarlögmaður og eiginmaður Álfheiðar Ingadóttur, fyrrverandi ráðherra, stofnaði félagið Sýrey ehf. hinn 25. ágúst 2005 fyrir Kaupþing og skráði það sama dag hjá fyrirtækjaskrá Ríkiskattstjóra í Reykjavík.
Þetta kemur fram í færslu Álfheiðar Ingadóttur á Facebook. Í Morgunblaðinu í dag var fjallað um aðkomu lögfræðistofunnar Mossack Fonseca að stofnun fjölda íslenskra félaga sem tengdust Landsbankanum og Kaupþingi fyrir bankahrun.
Skrifstofa Mossack Fonseca á Tortóla í Bresku jómfrúaeyjum var mikið notuð af íslensku bönkunum fyrir hrunið, til dæmis við kaup á hlutabréfum.
Frétt mbl.is: Mossack Fonseca nýttist við bankakaup
Í umfjöllun Morgunblaðsins í dag kemur fram að Sigurmar hafi stofnað félagið Sýrey og verið forsvarsmaður þess þegar það var skráð á Tortóla.
Frétt mbl: Eiginmaður Álfheiðar hjá Mossack Fonseca
Álfheiður segir Sýrey ehf. hafa verið stofnað fyrir Kaupþing í þeim tilgangi að ganga frá uppgjöri á skuldum tiltekins manns við bankann. Því verki hafi Sigurmar lokið.
Hinn 10. febrúar 2006 hafi verið haldinn fundur í félaginu þar sem Sigurmar fór úr stjórn.
Eftir það hafi Sigurmar ekki haft nein afskipti af þessu félagi.
Hún telur að með umfjölluninni sé fyrst og fremst verið að reyna koma höggi á sig og Vinstri græna.
Í ársreikningum Sýreyjar frá 2005 til 2014 kemur fram að félagið hafi verið í eigu Holt Investment Group Ltd.
Samkvæmt gögnum frá fyrirtækjaskrá Lúxemborgar var Holt Investment Group skráð á Bresku jómfrúaeyjum í árslok 2010 og átti félagið Holts Holding S.A. það að fullu.
Uppfært kl. 16:00 - Yfirlýsing frá Sigurmari
Sigurmar sendi í dag frá sér yfirlýsingu vegna umfjöllunarinnar. Þar segist hann í starfi sínu sem lögmaður hafa stofnað mörg félög fyrir umbjóðendur sína í margvíslegum tilgangi.
„Ekkert þeirra hefur verið stofnað á erlendri grundu og ennþá síður í þeim tilgangi að koma verðmætum í skattaskjól eða annað í þeim dúr. Í sumum tilfellum hef ég setið sem lögmaður í stjórn þessara félaga, stundum í einn sólarhring og stundum lengur en ávallt til þess eins að brúa bil þar til eigendur félaganna taka við stjórnartaumum,“ segir hann.
„Í því tilfelli sem gert hefur verið að umfjöllunarefni í dag vil ég taka það fram að félagið Sýrey ehf. var stofnað í ágúst árið 2005, fyrst með heimilisfesti á skrifstofu minni í Reykjavík og síðar að Bíldshöfða 14. Ég sat ég í stjórn þess um sex mánaða skeið eða til 10. febrúar árið 2006. Síðan hef ég hvorki heyrt né séð þetta félag og hvorki komið nálægt nafnbreytingu þess né hugsanlegum flutningi á heimilisfesti.“
„Sama gildir um langflest önnur félög sem ég hef stofnað og tengst tímabundið. Slík þjónusta er einfaldlega hluti af daglegum verkefnum fjölmargra lögmanna – jafnvel þeirra sem deilt hafa lífinu hamingjusamlega með fólki úr stjórnmálageiranum.“
Tveir milljarðar tapast vegna vatnsskorts
Stofna framkvæmdanefnd um málefni Grindavíkur
Dómari vanhæfur í Hvammsvirkjunarmáli
Verkfallsaðgerðir á Keflavíkurflugvelli samþykktar
„Byggja varnargarð utan um fólkið okkar“
Átta létust og 229 slösuðust alvarlega
Fólk í kosningateymi Höllu fékk milljónir frá OS
