Viðskipti | mbl | 3.5.2016 | 15:23

Staða Kristjáns fer að skýrast

Kristján Gunnar Valdimarsson

Staðan í máli Kristjáns Gunnars Valdimarssonar, lektors í skattarétti við Háskóla Íslands, fer bráðlega að skýrast að sögn Jóns Atla Benediktssonar, rektors.

Kristján Gunnar flæktist inn í umfjöllun um Panamaskjölin. í Kastljósi var birtur tölvupóstur frá Kristjáni þar sem hann óskaði eftir að fá nokkurs konar umboð fyrir aflandsþjónustu lögmannsstofunnar Mossack Fonseca hér á landi. Notaði hann titil sinn við Háskóla Íslands er hann hafði samband við lögmannsstofuna.

Lögmannsstofan Promptus, sem er í eigu Kristjáns, sá um stofnun aflandsfélagsins fyrir borgarfulltrúann Júlíus Vífill Ingvarsson.

„Þetta er ennþá til skoðunar innan Háskóla Íslands en málið fer allt að skýrast,“ segir Jón Atli í samtali við mbl. „Í grunninn er þetta hins vegar starfsmannamál og ég get því lítið tjáð mig um það.“

Aðspurður um ferlið í svona málum segir Jón Atli að þegar mál sem þessi eru tekin upp sé fyrst leitað viðbragða hjá viðkomandi starfsmanni. Að því loknu er tekin ákvörðun um hvort málið verði sett í formlegt ferli.

Var forstöðumaður skattasviðs LÍ

Næsta skref í máli Kristjáns Gunnars yrði að setja það í formlegt ferli, verði það ákveðið.

Kristján Gunnar hefur kennt skattarétt við lagadeild Háskóla Íslands um árabil. Hann var skattstjóri í Vestfjarðaumdæmi um þriggja ára skeið, eða frá 1991 til 1993, og stjórnaði eftirlitsskrifstofu skattstjórans í Reykjavík í sjö ár, eða frá 1993 til 2000.

Hann var forstöðumaður skattaráðgjafar Búnaðarbanka Íslands frá 2000 til 2003 en forstöðumaður skattasviðs Landsbanka Íslands frá 2003 til 2008.

Frétt mbl.is: HÍ skoðar stöðu skattalektors

Fréttmbl.is: Vildi „umboð“ fyrir aflandsþjónustu