Flugfélögin stundvísari í apríl

Farþegi á leið frá Keflavíkurflugvelli má búast við því að flug sé á réttum tíma í 84% tilvika samkvæmt úttekt Dohop. Easyjet var stundvísasta flugfélagið í aprílmánuði en 82% áætlaðra flugferða þess var á réttum tíma þá. Mestar tafir reyndust hjá Wowair.

Dohop skoðaði stundvísi þeirra þriggja flugfélaga sem eru með flest áætlunarflug frá Keflavíkurflugvelli í apríl. Heilt yfir er breska lággjaldaflugfélagið easyJet stundvísast. Icelandair var stundvísast við brottfarir, en Easyjet við komur.

Lendingar á Keflavíkurflugvelli voru á tíma í 74% tilvika. Þegar heildarstundvísi var skoðuð burtséð frá því hvort um komuflug eða brottför væri að ræða, sást að Easyjet var stundvísasta flugfélagið en þó munar aðeins 2% á Icelandair og easyJet. 5% munur er á stundvísi WOWair og Easyjet.

Fyrr í ár var munurinn á stundvísasta og óstundvísasta flugfélaginu meiri eða um 15%. Í febrúar voru öll þrjú flugfélögin óstundvísari en óstundvísasta flugfélagið nú og segir Dohop þannig að mikið hafi breyst til hins betra síðustu vikur.

Við útreikninga á stundvísi flugfélaganna notast Dohop við tölur frá Isavia. Sóttar eru upplýsingar um áætlaða brottfarar- og komutíma einstakra fluga og þær tölur bornar saman við raunverulegan tíma brottfara og koma. 

• Blogga um frétt