Miðborgin er jafnt og þétt að missa þau sérkenni sem felast í rekstri gamalla og rótgróinna fyrirtækja. Þetta segir Sigurður Már Guðjónsson, bakara- og kökugerðarmeistari hjá Bernhöftsbakaríi.
Í umfjöllun um mál þetta í Morgunblaðinu í dag segir hann, að gríðarlegur þrýstingur sé á eigendur fasteigna í miðborginni að segja upp leigusamningum við rótgróin fyrirtæki til að koma að starfsemi sem talin er geta þjónað betur þeim ferðalöngum sem sækja höfuðborgina heim.
„Ég hef starfað hér á Bergstaðastrætinu frá árinu 1992 og ég hef skynjað miklar breytingar á allra síðustu árum. Það á ekki bara við um okkar fyrirtæki heldur mörg önnur fyrirtæki. Sum sögufræg kennileiti í borginni hafa hreinlega horfið á braut. Þetta voru allt fyrirtæki sem settu mikinn svip á miðborgina og héldu lífinu í henni. Saga Reykjavíkurborgar liggur í þessum rótgrónu fyrirtækjum sem mörg eru að skríða inn á aðra öldina. Þetta eru fyrirtæki á borð við Vísi, sem nýlega var flæmdur burt, og einnig verslun Jóns Sigmundssonar. Nýjasta dæmið er kaffihúsið Tíu dropar við Laugaveg.“