Evrópubúar áhyggjufyllri en Bretar

Neytendur á Spáni, Ítalíu og Portúgal hafa meiri áhyggjur af því hvaða áhrif útganga Breta úr ESB muni hafa á efnahag þjóða sinna en Bretar sjálfir. Þetta er niðurstaða nýrrar skoðanakönnunar Mintel markaðsrannsóknafyrirtækisins.

Rúmlega 7.000 manns tóku þátt í könnuninni, sem sýndi að 48% þeirra Spánverja sem svöruðu töldu að útganga Breta myndi hafa „nokkur“ eða „veruleg“ neikvæð áhrif á efnahag Spánar. 41% Ítala og Pólverja voru sömu skoðunar.

Neytendur í öllum þremur löndunum hafa áhyggjur að áhrifin muni ná til vinnuframboðs heimafyrir. Að sögn Mintel voru 39% breskra neytenda þeirrar skoðunar að útgangan úr ESB myndi hafa neikvæð áhrif á þjóðina, á meðan að 25% töldu líklegt að útgangan hefði „veruleg“ eða „nokkuð“ jákvæð áhrif á efnahag landsins.

„Stöðugur efnahagsvöxtur síðustu fimm ára og minnkandi atvinnuleysi þýðir að margir telja sig örugga gagnvart mögulegum neikvæðum áhrifum útgöngunnar,“ sagði Toby Clark rannsóknastjóri Mintel.

Reuters fréttastofan segir upplýsingar frá breska seðlabankanum ekki benda til þess að neysluvenjur Breta hafi tekið miklum breytingum nýlega.

Einkaneysla hefur verið ein helsta driffjöður aukins hagvaxtar í Bretlandi sl. þrjú ár, en hagfræðingar sem Reuters fréttastofan ræddi við, telja flestir að 60% líkur séu á því að efnahagskreppa muni fylgja í kjölfar útgöngunnar úr ESB.

• Blogga um frétt