Hækka yfirtökutilboð í SABMiller

Bjórframleiðandinn Anheuser-Busch InBev hefur hækkað yfirtökutilboð sitt í keppinautinn SABMiller. Samkvæmt nýja tilboðinu er markaðsvirði SABMiller metið á 79 milljarða punda, en áður hafði AB InBev metið framleiðandann á 70 milljarða punda.

Var tilboðið hækkað um eitt pund á hvern hlut og hljóðar því nú upp á 45 pund á hlut.

Forsvarsmenn SABMiller segjast hafa sest niður með forsvarsmönnum AB InBev í síðustu viku og sammælst um að breyta tilboðinu vegna gengislækkunar pundsins. Pundið hefur hríðfallið í verði eftir að Bretar samþykktu í þjóðaratkvæðagreiðslu að segja skilið við Evrópusambandið.

Hefur gengi pundsins lækkað um 12% gagnvart Bandaríkjadalnum frá þjóðaratkvæðagreiðslunni 23. júní síðastliðinn.

Fyrirtækin tvö komust að samkomulagi um kaupin í fyrra. Sameinað fyrirtæki verður stærsti bjórframleiðandi heims með um 30% hlutdeild á markaðinum.

Helstu hluthafar í SABMiller sættu sig ekki við fyrra tilboð stjórnar AB InBev og töldu sig fá minna fyrir sinn snúð vegna gengislækkunar pundsins. 

Forsvarsmenn SABMiller sögðust í tilkynningu ætla að ræða við hluthafa sína áður en þeir tækju afstöðu til nýjasta tilboðsins. Frekari tilkynningar væri að vænta.

Forsvarsmenn AB InBev áréttuðu að tilboðið væri algjört lokatilboð.

• Blogga um frétt