Heimsmarkaðsverð á hráolíu hélt áfram að lækka í Asíu í dag og hefur lækkað um tæplega 20% frá því í byrjun júní er verð á olíutunnu fór yfir 50 Bandaríkjadali. Líklegt þykir að verð á olíu fari niður fyrir 40 Bandaríkjadali tunnan á næstu dögum.
Verð á West Texas Intermediate-hráolíu lækkaði í morgun um 22 sent tunnan og er hún nú á 40,92 Bandaríkjadali á hrávörumörkuðum í Asíu. Brent-Norðursjávarolía lækkaði um 24 sent og er á 42,46 dali tunnan. Þetta er sjöundi dagurinn í röð sem verð á hráolíu lækkar á mörkuðum í Asíu. Lækkunin er rakin til ótta um minni eftirspurn á sama tíma og framleiðsla hefur aukist.
Jonathan Barratt, yfirmaður fjárfestinga hjá verðbréfafyrirtækinu Ayers Alliance Securities í Sydney, segir í viðtali við Bloomberg News að það sé allt of mikið af olíu á markaði. Verð á hráolíu sveiflist nú á milli 40 og 50 dala tunnan en ef verðið fari niður fyrir 40 dali tunnan þá fylgi því vandamál.