Iðnaðarmenn snúa aftur heim frá Noregi

Fjöldi iðnaðarmanna flutti utan til Noregs vegna verkefnaskorts á árunum eftir hrunið. Nú hafa aðstæður breyst hérlendis og skortur er á innlendu vinnuafli í mörgum greinum í byggingariðnaði.

„Ég held að ekki sé vafi á því að fjöldi iðnaðarmanna sem fluttu utan, til dæmis til Noregs, í kjölfar kreppunnar og ekki hafa þegar flust heim að nýju, hefur áhuga á að flytja til baka til landsins.“

Þetta segir Svanur Karl Grjetarsson, framkvæmdastjóri byggingafélagsins Mótx ehf., í umfjöllun um vöxt í byggingastarfsemi og skort á iðnaðarmönnum í þeim geira í ViðskiptaMogganum í dag. Félag hans byggir nú nær 100 íbúðir í landi Helgafells í Mosfellsbæ og í Bæjarlind í Kópavogi, auk atvinnuhúsnæðis í Norðlingaholti.