Allt á áætlun hjá Hard Rock

Framkvæmdir við Hard Rock í Lækjargötu eru nú á lokametrum og ganga vel. Að sögn framkvæmdastjóra Hard Rock á Íslandi, Stefáns Magnússonar, eru framkvæmdirnar á áætlun og verður staðurinn opnaður í lok mánaðar.

70 manns voru ráðnir til starfa á staðnum eftir svokallaða ráðningarhelgi sem haldin var í september. Stefán segir starfsfólkið hafa byrjað í þjálfun í síðustu viku og komu nítján þjálfarar frá Hard Rock til landsins til þess að stjórna henni. Þeir verða á landinu fram yfir opnun staðarins og segir Stefán þjálfunina mikið ferli.

Aðspurður um útlit staðarins segir hann það ekki endilega eins og fólk á að venjast á Hard Rock.

„Þetta er svolítið nýtt „lúkk“ á þessu öllu, ekki alveg gamli pakkinn. Við fengum aðeins að stjórna þessu sjálf en útlitið er þó alltaf háð samþykki frá Hard Rock. Við gerum ekki bara hvað sem er,“ segir Stefán í samtali við mbl.is.