Stýrivextir hækkaðir vestanhafs

Seðlabanki Bandaríkjanna hækkaði stýrivexti um 0,25 prósentustig í dag og vísaði peningastefnunefnd hans til uppgangs í efnahagslífi landsins. Stýrivextir verða nú á bilinu 0,5 til 0,75% en nefndin segir að líklega verði vextirnir aðeins hækkaðir hægum skrefum í framtíðinni.

Janet Yellen, seðlabankastjóri Bandaríkjanna, segir að hægt sé að líta á stýrivaxtahækkunina sem traustsyfirlýsingu á hagkerfið. Þetta er fyrsta hækkun stýrivaxta í Bandaríkjunum frá því í desember í fyrra og aðeins önnur á áratug.

Fyrir hækkunina voru bandarískir stýrivextir á bilinu 0,25 til 0,5%. Hlutabréfamarkaðir féllu eftir að tilkynnt var um ákvörðunina. Yellen tjáði sig ekki um viðbrögð markaðarins en stakk upp á að ástæðan gæti verið loforð Donalds Trump, verðandi forseta, um skattalækkanir.

• Blogga um frétt