PETA kaupir hlut í Louis Vuitton

Samtökin PETA, sem berjast fyrir réttindum dýra, hafa keypt hlut í tískufyrirtækinu Louis Vuitton Moet Hennesy (LVMH), sem m.a. á tískumerkin Louis Vuitton, Fendi og Marc Jacobs, í því skyni að þrýsta á fyrirtækið að hætta að selja töskur og aðrar vörur úr skinnum framandi dýrategunda.

Með kaupum sínum á hlut í fyrirtækinu, öðlast fulltrúar PETA rétt til að taka þátt í hluthafafundum og að leggja spurningar fyrir stjórnina í návist annarra hluthafa.

Fréttavefur BBC segir ekki hafa verið gefið upp hve stóran hlut PETA keypti, en kaupin tengjast rannsóknum samtakanna á því hvernig farið er með þá krókódíla sem ræktaðir eru sérstaklega fyrir skinn sín.

„Í kjölfar afhjúpunar á því hvernig skriðdýr á krókódílabúgörðum í Víetnam – þar á meðal tveimur sem hafa selt sútunarstöðvum í eigu móðurfélags Louis Vuitton, LVMH ... þá er PETA orðinn hluthafi í LVMH til að þrýsta á fyrirtækið að hætta að selja vörur úr framandi skinnum,“ sagði í yfirlýsingu frá PETA. Fyrirtækið lýsir því einnig hvernig krókódílarnir eru geymdir í litlum gryfjum og stundum byrjað að skera í þá á meðan þeir eru enn lifandi.

Haft var eftir Sylvie Bernard, umhverfisstjóra LVHM, þegar PETA birti myndband sitt í síðasta mánuði að sútunarfyrirtæki sitt hefði ekki keypt krókódílaskinn frá víetnömskum krókódílabúgörðum frá því 2014.

• Blogga um frétt