Samsung-erfinginn í aðra yfirheyrslu
Setja bókamerki
Lee Jae-yong, erfingi Samsung veldisins hefur verið yfirheyrður í annað skiptið vegna eins stærsta spillingarmáls Suður-Kóreu. Málið hefur vakið gríðarlega athygli en Lee hefur stöðu sakbornings.
Er talið að seinni yfirheyrslan muni ákvarða hvort að saksóknarar í málinu sækist eftir því að gefa úr handtökuskipun á hendur Lee.
Þing Suður-Kóreu samþykkti í desember að kæra forseta landsins, Park Geun-Hye, í tengslum við málið og fer forsætisráðherra landsins, Hwang Kyo-Ahn, með embættisstörf hennar á meðan rannsókn stendur yfir.
Choi Soon-Sil, uppnefnd „Raspútín Kóreu“, sem var trúnaðarvinkona forsetans, Park Geun-Hye, er sökuð um að hafa notfært sér samband þeirra til að knýja fram fjárframlög að andvirði sjö milljarða króna frá fyrirtækjum, m.a. Samsung, til stofnunar sem hún stjórnar.
„Ég mun enn og aftur segja sannleikann,“ sagði Lee við fjölmiðla á leið inn í skýrslutökuna. Hann hafði síðast verið yfirheyrður í janúar en þá fékkst ekki handtökuskipun á hendur honum. Rannsakendur hafa endurskoðað málið síðustu vikur og segjast hafa fundið atriðið sem þarfnast útskýringar Lee.
Saksóknarar í málinu halda því m.a. fram að Samsung hafi gefið fyrirtæki Choi andvirði 338 milljóna króna í skiptum við pólitíska greiða. Við yfirheyrslur viðurkenndi Lee að Samsung hefði gefið hluta af þeirri upphæð til fyrirtækisins en neitaði að hafa sóst eftir greiðum í staðinn.
Þá hefur Lee viðurkennt að fyrirtækið hafi gefið dóttur Choi hest og peninga til þess að hjálpa til við reiðmennskuferil hennar. Lee sagðist þó sjá eftir þeirri ákvörðun.
Flugvél Icelandair til Glasgow snúið við
„Dómurinn hefur ríkt fordæmisgildi“
„Ég er forsetaframbjóðandi, ekki hommi í framboði“
„Ég er einfaldlega of heiðarlegur“
Vænta þess að um tímabundið ástand sé að ræða
Skoða að taka upp gjaldskyldu á notkun nagladekkja
Samþykkt kaup á fasteignum að virði 52 milljarða