Icelandair kaupir nýjan flughermi

Dótturfélag Icelandair sem sér um þjálfunarsetur félagsins í Hafnarfirði hefur skrifað undir kaupsamning á nýjum Boeing 737MAX flughermi. Icelandair er fyrsta flugfélagið sem festir kaup á slíkum hermi, en Boeing flugvélaframleiðandinn er um þessar mundir sjálfur að gangsetja fyrstu fjóra flughermana í heiminum fyrir Boeing 737MAX.

Stefnt er að því að hermirinn verði tekinn í notkun sumarið 2018, á svipuðum tíma og nýjar vélar Icelandair af þessari sömu gerð verða teknar í notkun. Þetta kemur fram í tilkynningu frá Icelandair, en það er dótturfélagið TRU Flight Training Iceland sem rekur hermana.

Ný bygging, áföst þjálfunarsetri félagsins í Hafnarfirði, verður reist yfir herminn. Flughermar eru notaðir við nýþjálfun og reglubundna þjálfun flugmanna.

Fyrir tveimur árum tók félagið í notkun Boeing 757-200 flughermi og fluttist þá stærstur hluti þjálfunar flugmanna Icelandair inn í landið. Rekstur hermisins hefur reynst mjög vel og á síðasta ári var nýting hans 18 klukkustundir að meðaltali á sólarhring. Icelandair er stærsti notandinn, en erlend flugfélög svo sem FedEx, kaupa einnig þjálfun fyrir sína flugmenn í herminum.

„Ákvörðunin um kaupin á 737MAX flughermi byggir einkum á hinum miklu vinsældum þessarar nýju flugvélagerðar en hún hefur selst hraðar en nokkur önnur vél í sögu Boeing. Um 3600 Boeing 737MAX hafa þegar verið seldar, til viðbótar við þær níu þúsund 737 vélar sem fyrir eru í heiminum, og ljóst að mikil spurn verður eftir flughermiþjálfun flugmanna þegar vélarnar koma á markað,“ er haft eftir Guðmundi Erni Gunnarssyni, framkvæmdastjóri TRU Flight Training Iceland.

• Blogga um frétt