Hlutabréfavirði Marel ætti að vera um 386 krónur á hlut samkvæmt nýrri greiningu IFS, en við lok markaða í gær var gengi fyrirtækisins 305 krónur á hlut. Miðað við þessa greiningu telur IFS gengi Marels verulega undirverðlagt og meta þeir virði bréfanna 27% yfir markaðsvirði.
Í greiningunni er vísað til þess að niðurstöður síðasta ársfjórðungs 2016 hafi verið mun betri en gert hafi verið ráð fyrir. Meðal annars hafi EBITDA verið 23% yfir væntingum og pöntunarbók félagsins hafi einnig verið sterkari en reiknað var með.
Horft eitt ár fram í tímann telur IFS að horfur Marel séu jafnvel enn betri en núverandi staða og spá þeir því að gengi félagsins hækki um 40% miðað við núverandi markaðsvirði. Segir í greiningunni að meðal annars sé horft til þess að afkoma fiskihluta fyrirtækisins muni batna með tilkomu samstarfs við Lerøy í Noregi.