Skotkökur og skoteldar í sölubann

Neytendastofa hefur tekið ákvörðun um sölubann á tveimur skotkökum og þremur skoteldum sem flutt voru til landsins af fyrirtækjunum Stjörnuljós ehf. og E-þjónustunni.

Skotkökurnar Stormur og Litríkar þrumur voru fluttar til landsins gegnum Stjörnuljós ehf. en við prófun kom í ljós að kveikurinn á skotkökunni Litríkum þrumum var of lengi að kveikja á sér.

„Alvarleg hætta er fólgin í því að fólk telur að ekki hafi kviknað í skotkökunni og snýr aftur að kökunni sem þá tekur að springa. Auk þess kom í ljós að þrjár af hverjum 10 kökum voru ekki nægilega stöðugar og gat kakan jafnvel oltið á hliðina. Þá var galli í hönnun á skotkökunni STORMUR,“ segir á vef Neytendastofu en prófunin og skoðun Neytendastofu er hluti af samevrópsku átaksverkefni um öryggi skotelda. 

Þá eru flugeldurinn PPATA, skotkakan Secret Gift og stjörnuljósin Gold Sparklers komin í sölubann en vörurnar voru fluttar inn af E-þjónustunni.

Við prófun á PPATA kom í ljós að hann breytti um stefnu þegar honum var skotið á loft. Þá var efni sem féll af skoteldinum eftir að honum var skotið á loft þyngra en leyfileg mörk samkvæmt staðli eru. „Alvarleg hætta er fólgin í því ef að flugeldur fer ekki í rétta stefnu,“ segir á vef Neytendastofu.

„Við prófun á skotkökunni kom í ljós að kveikurinn var of lengi að kveikja á sér, kakan var ekki nógu stöðug eftir að búið var að kveikja á henni, hún fór ekki eins hátt og hún átti að gera auk þess sem að hvellurinn var yfir hávaðamörkum. 

Stjörnuljósin stóðust prófun en þar sem að þau voru ekki CE-merkt er ekki leyfilegt að setja þau aftur í sölu um næstu áramót þar sem frá og með næstu áramótum eiga allir flugeldar að vera CE-merktir.“

Prófunin og skoðun Neytendastofu er hluti af samevrópsku átaksverkefni um öryggi skotelda. 

• Blogga um frétt