Rannsóknarsetur verslunarinnar þarf að leggja niður þann hluta smásöluvísitölunnar sem mælir veltu dagvara og klæða í kjölfar ákvörðunar Haga um að hætta þátttöku í íslensku smásöluvísitölunni. Þetta segir Emil B. Karlsson, forstöðumaður Rannsóknarseturs verslunarinnar.
Greint var frá því í Morgunblaðinu í dag að Hagar hefðu tilkynnt Rannsóknarsetri verslunarinnar um að taka ekki lengur þátt í íslensku smásöluvísitölunni. Forstjóri Haga segir að þátttaka þjóni ekki hagsmunum fyrirtækisins.
„Við höfum ekki meira í höndunum en tilkynninguna frá þeim um að þetta samræmis ekki hagmunum þeirra,“ segir Emil. Hann segir að ákvörðun Haga hafi aðeins áhrif á dagvörur og föt, aðrir þættir vísitölunnar verði áfram til staðar, til að mynda byggingarvörur, húsgögn og áfengi.
„Hagar eru með það stóra markaðshlutdeild í dagvörunni að mælingin yrði marklaus og fyrirtækið hefur verið með í vísitölunni í 15 ár.“
Emil segir að smásöluvísitalan gefi fyrstu vísbendingar um neyslubreytingar, hvort sem um er að ræða aukningu eða samdrátt. Slíkar upplýsingar hafi bæði nytsemi fyrir fyrirtækið sjálft og greiningaraðila. Spurður hvort að ákvörðun Haga leiði til þess að hægja muni á upplýsingaöflun og upplýsingaflæði á veltu á smásölumarkaði svarar Emil játandi.