Útlit fyrir betri afkomu Icelandair

Samkvæmt drögum að árshlutareikningi Icelandair Group fyrir þriðja ársfjórðung 2017 er EBITDA félagsins, rekstrarhagnaður fyrir afskriftir og fjármagnsliði, í fjórðungnum hærri en gert var ráð fyrir í afkomuspá ársins sem birt var 27. júlí og hljóðaði upp á 150-160 milljónir Bandaríkjadala.

Jafnframt hafa afkomuhorfur fyrir fjórða ársfjórðung styrkst. Icelandair gerir nú ráð fyrir því að rekstrarhagnaður fyrir afskriftir og fjármagnsliði nemi 165-175 milljónum Bandaríkjadala, 17,5 til 18,5 milljörðum króna, í ár.

Samkvæmt drögum að árshlutareikningi er EBITDA þriðja ársfjórðungs 161,1 milljón Bandaríkjadala, sem svarar til 17 milljarða króna. Helstu ástæður fyrir betri afkomu á þriðja ársfjórðungi en gert hafði verið ráð fyrir eru hærri farþegatekjur og hagstæð gengisþróun sem vegur þyngra en neikvæð þróun olíuverðs, samkvæmt tilkynningu sem send var til Kauphallarinnar í gærkvöldi.

Icelandair Group birtir uppgjör sitt fyrir þriðja ársfjórðung ársins 2017 fimmtudaginn 26. október 2017.

• Blogga um frétt